TEHERAN – Irani paralajmëron sulme ndaj infrastrukturës në rajon pas kërcënimeve të Trump

TEHERAN, 16 korrik /ATSH-DPA/- Irani ka paralajmëruar se do të kundërpërgjigjet me forcë, pasi presidenti amerikan, Donald Trump kërcënoi këtë javë se do të godasë infrastrukturën e rëndësishme të vendit.

Sipas një deklarate të Shtabit Qendror Khatam al-Anbiya, të publikuar sot nga agjencia iraniane e lajmeve “Fars”, çdo sulm ndaj infrastrukturës iraniane, do ta bëjë infrastrukturën në të gjithë Lindjen e Mesme, një objektiv të ligjshëm për sulme.

Irani ka goditur edhe më parë objekte të prodhimit të energjisë dhe infrastrukturë civile, në vende fqinje aleate të SHBA-së, gjatë periudhave të tensioneve të larta në rajon.

Në një intervistë për “Fox News” të martën në mbrëmje, Trump deklaroi se forcat amerikane do ta godasin Iranin “shumë fort” derisa ai të vendosë se “mjafton”.

“Javën e ardhshme situata do të bëhet shumë e rëndë për ta. Do të vijë radha e hidrocentraleve. Do të vijë radha e urave. Ne do t’i shkatërrojmë të gjitha hidrocentralet dhe të gjitha urat e tyre, nëse nuk ulen në tryezën e negociatave”, tha Trump. /