Tensionohen marrëdhëniet Ankara-Uashington
Ambasada amerikane në Ankara njoftoi ditën e sotme se Departamenti i Shtetit i ka lejuar diplomatët, familjarët e tyre dhe stafin e ambasadës që të vendosin me vullnet të lirë për t’u larguar nga vendi apo jo. Një deklaratë e tillë vjen pas gjendjes së emergjencës së shpallur pas grushtit të dështuar të shtetit më 15 korrik.
Largimi vullnetar i punonjësve të ambasadës dhe familjarëve të tyre vlen si për ambasadën e SHBA-së në Ankara, ashtu edhe për Konsullatën e Përgjithshme të SHBA-së në Stamboll.
Situata mes Ankarasë dhe Uashingtonit është acaruar këto ditët e fundit. Personelit amerikan i është ndaluar nga Uashingtoni që të udhëtojë në provincat juglindore të vendit dhe është këshilluar që të shmangin edhe zonat në afërsi të kufirit me Sirinë.
Ditën e hënë, ministri i Jashtëm turk, Mevlut Cavusoglu, tha përpara udhëtimit të tij drejt Uashingtonit, se marrëdhëniet mes dy vendeve mund të kriseshin në rast se SHBA-ja nuk ekstradon Fethullah Gylenin. Ankaraja akuzon rivalin e presidentit Erdogan për puçin.
