Terrorizimi, vendet arabe kërkojnë izolimin e Katarit

Egjipti, Arabia Saudite, Emiratet e Bashkuara Arabe dhe Bahrejni, kanë njoftuar ndërprerjen e marrëdhënieve diplomatike me Katarin, pas rritjes së tensioneve mes vendeve të Gjirit Persik. Vendimi i katër shteteve arabe, mbërrin në një kohë kur Katari është ndarë nga vendet e Gjirit, duke dalë në mbështetje të grupeve islamike.

Arabia Saudite pohon që trupat nga Katari janë tërhequr nga lufta që po zhvillohet në Jemen. Bahrejni akuzon Katarin për “ndikim në media, në mbështetje të aktiviteteve terroriste të armatosura dhe financimin e grupeve të lidhura me Iranin për të sabotuar dhe përhapur kaos në Bahrejn”.

Bahrejni, Egjipti, Arabia Saudite dhe Emiratet e Bashkuara Arabe, kanë njoftuar tërheqjen e personelit të tyre diplomatik nga Katari, një shtet i pasur me gaz dhe që do të presë Botërorin e futbollit në vitin 2022. Katër shtetet arabe, kanë njoftuar se duan të ndërpresin edhe trafikun ajror dhe shërbime të tjera në gadishull. Kompania ajrore “Etihad”, ka njoftuar ndërkohë që do të ndërpresë udhëtimet drejt Katarit.