Tesla prezanton sonte Roadster-in e ri pas gati nëntë vjetësh pritjeje

Tesla pritet të zbulojë sonte, të enjten, versionin e ridizajnuar të makinës sportive Roadster, siç njofton Reuters, në një aktivitet që nis në orën 20:55 sipas orës lindore (EDT) në një qendër testimi të SpaceX në McGregor të Teksasit. Prezantimi mbyll një pritje prej gati nëntë vjetësh për modelin që dikur ishte simboli i ambicieve të prodhuesit amerikan të automjeteve elektrike.

Gjenerata e dytë e Roadster-it u shfaq për herë të parë si prototip në vitin 2017, me një çmim të shpallur rreth 200 mijë dollarë dhe rezervime që kërkonin një parapagim prej 50 mijë dollarësh. Dorëzimet ishin premtuar për vitin 2020, por afati u shty disa herë gjatë viteve, ndërsa Tesla nuk e ka përditësuar ende çmimin e modelit.

Drejtuesi i kompanisë, Elon Musk, e ka minimizuar më parë rëndësinë financiare të Roadster-it për Tesla-n. Analisti i Morningstar, Seth Goldstein, e vlerëson megjithatë modelin si makinën “halo” që i mungon gamës së kompanisë dhe parashikon rreth 2 mijë shitje në vit, një shifër e vogël krahasuar me rreth 1.6 milionë automjetet që Tesla shiti vitin e kaluar.

Kur e prezantoi prototipin në vitin 2017, Musk fliste për një autonomi prej rreth 1.000 kilometrash me një karikim. Në vitin 2024, ai deklaroi se modeli i ridizajnuar, i zhvilluar në bashkëpunim me SpaceX, do të përshpejtonte nga 0 në 100 kilometra në orë në më pak se një sekondë.

Prezantimi vjen në një moment kur Tesla po e zhvendos gjithnjë e më shumë fokusin drejt drejtimit autonom të bazuar te inteligjenca artificiale dhe robotikës. Këtë vit kompania ndaloi shitjen e modeleve Model S dhe Model X për t’i hapur vend prodhimit të robotëve humanoidë Optimus dhe hodhi në treg robotaksinë Cybercab, pa timon dhe pa pedale. Roadster-i origjinal, i prodhuar nga viti 2008 deri në 2012 si makina e parë e Tesla-s, ishte ndërtuar mbi shasinë e Lotus Elise.