Tomoviq: Këshilli nuk mund ta rishkruajë vetë sistematizimin e vendeve të punës në ASK

Anëtari i Këshillit të Agjencisë për Parandalimin e Korrupsionit (ASK), Mladen Tomoviq, kërkoi që të shfuqizohen dy përfundime të miratuara më parë nga ai organ, të cilat lidhen me sistematizimin e propozuar të vendeve të punës, duke vlerësuar se Këshilli nuk duhet të marrë kompetencat e drejtoreshës së Agjencisë e as ta ndryshojë vetë organizimin e punës së institucionit, siç njofton Vijesti.

Tomoviq, gjatë seancës së djeshme të Këshillit, paralajmëroi se një veprim i tillë mund ta vinte në pikëpyetje ligjshmërinë e rregullores së ardhshme për organizimin e brendshëm dhe sistematizimin, duke insistuar që të ndahen qartë kompetencat e drejtoreshës, sindikatës dhe Këshillit. Kërkesa e tij e parë lidhej me përfundimin e mëparshëm me të cilin ishte propozuar ndryshimi i kushteve për vendin e punës të sekretarit të Këshillit, sipas të cilit, në vend të arsimimit ekskluzivisht juridik, do të mundësohej punësimi edhe i kandidatëve me fakultete të shkencave shoqërore.

Tomoviq përsëriti se sekretari i Këshillit duhet të jetë jurist: “Ky është një vend ku duhet të jetë një njeri me fakultet juridik të përfunduar. Neve, si anëtarë të Këshillit, na nevojitet pikërisht një profil i tillë arsimor”, tha ai, duke kujtuar se fakulteti juridik si kusht ishte parashikuar edhe në propozimet e mëparshme të sistematizimit.

Ai kërkoi edhe shfuqizimin e përfundimit sipas të cilit sugjerimet individuale të anëtarëve të Këshillit për propozimin e sistematizimit duhet t’i dërgohen sindikatës së ASK-së për mendim. Tomoviq saktësoi se Ligji i punës parashikon që sindikata jep mendim për propozimin e aktit të sistematizimit që e dorëzon drejtori, jo për propozimet individuale të anëtarëve të Këshillit: “Sindikata nuk mund të japë mendim për propozimet individuale të anëtarëve të Këshillit. Drejtoresha do të pranojë ose jo diçka nga ato propozime dhe pastaj një akt të tillë do t’ia dërgojë sindikatës për mendim”, tha ai.

“Më shqetëson sinqerisht mendimi juaj se Këshilli mund të merret vesh këtu, ta rishkruajë sistematizimin si të dojë dhe ta varë në tabelën e shpalljeve. Kjo që thatë është shumë e rrezikshme”, paralajmëroi Tomoviq, duke shtuar se Këshilli nuk mund ta “rishkruajë dhe vizatojë” sistematizimin siç i pëlqen ndonjë anëtari të tij. Kryetarja e Këshillit, Aleksandra Vukašinoviq, megjithatë pretendon se qëllimi i përfundimeve të mëparshme ishte të sigurohej një dialog konstruktiv midis Këshillit, drejtoreshës së Agjencisë Kristina Braletiq dhe përfaqësuesve të të punësuarve, dhe se Këshilli, si organi që miraton aktet e përgjithshme të Agjencisë, nuk mund të reduktohet në një organ që pranon pa shqyrtim çdo dokument që i dorëzon drejtoresha.