Totozani-kryebashkiakëve: Zbatoni detyrimet për posterat
Zyrtarisht fushata elektorale për zgjedhjet e 18 qershorit do dhe pak ditë të fillojë, dhe Avokati i Popullit i kërkon kryebashkiakëve zbatimin me korrektesë të detyrimeve për vendosjen e materialeve propagandistike gjatë procesit të zgjedhjeve.
Ai u ka dërguar rekomandim të gjithë kryetarëve të bashkive në vend, për zbatimin me korrektesë të detyrimeve ligjore.
Totozani kërkon marrjen e masave të nevojshme tekniko – organizative me qëllim zbatimin me korrektesë të detyrave ligjore të parashikuara në Kodin Zgjedhor të Republikës së Shqipërisë dhe Udhëzimet e KQZ-së nga strukturat e pushtetit vendor lidhur me vendosjen e materialeve propagandistike gjatë procesit të zgjedhjeve.
Gjithashtu kërkohet edhe monitorimi i vazhdueshëm i hapësirave publike të miratuara për vendosjen e posterave zgjedhore me qëllim të shmangien e situatave të cenimit të hapësirave të miratuara dhe garantimin e një mjedisi për zgjedhje sa më të ndershme dhe të lira.
“Në shumë raste, subjektet politike nuk janë informuar për hapësirat që u janë caktuar, apo kanë cenuar hapësirat e tjera publike, duke shkaktuar probleme në disa raste, të referuara tashmë në raportet e organizatave ndërkombëtare që janë angazhuar në monitorimin e proceseve zgjedhore në Shqipëri”, vëren z. Totozani.
