Tragjedi në Rodos: 62-vjeçari gjendet i vdekur pasi ujërat i rrëmbyen makinën, evakuime edhe në Evi

Një burrë 62-vjeçar humbi jetën të mërkurën në ishullin e Rodosit, i goditur nga moti i keq që ka përfshirë pjesë të mëdha të Greqisë. Sipas raportimit të Reuters, që citon rojën bregdetare greke, një përrua uji ia rrëmbeu makinën drejt plazhit në Stegna të Arkangjelos, rreth 30 kilometra nga qyteti i Rodosit, dhe trupi i tij u gjet në breg. Gjithsej katër makina u rrëmbyen nga ujërat dhe përfunduan në det në të njëjtën zonë.

Ishulli u përfshi nga reshje të rrëmbyeshme që në orët e para të mëngjesit. Siç njofton agjencia greke e lajmeve APE-MPE, rrugë u përmbytën, qarkullimi u vështirësua në disa zona dhe përmes numrit të emergjencës 112 qytetarët u thirrën që në orën 10:44 të kufizonin lëvizjet. Kryebashkiaku i Rodosit, Aleksandros Koliadis, e cilësoi situatën veçanërisht serioze dhe thirri një mbledhje urgjente për vlerësimin e dëmeve.

Probleme serioze u regjistruan edhe në Evi, ku dalja nga shtrati e lumit Kirea detyroi autoritetet të aktivizonin 112-shin: në mesditë banorët e zonës së Dirfisë–Mesapisë u thirrën të largoheshin drejt Psahnës, ndërsa më pas edhe banorët e Psahnës u udhëzuan të evakuoheshin drejt Nea Artakit. Sipas raportimeve të mediave greke, përmbytjet prenë rrugë të rrjetit që lidh veriun e ishullit me Halkidhën dhe një urë ndihmëse në zonën e Mantudit u shemb.

Në Skiathos, sipas kryebashkiakut Thodoris Tzoumas, të cituar nga APE-MPE, dëme kanë pësuar rreth 40–50 biznese dhe 15–20 shtëpi, dy makina u rrëmbyen nga ujërat dhe bashkia ka kërkuar shpalljen e gjendjes së emergjencës civile.

Shërbimi Meteorologjik Kombëtar (EMY) e zbriti pas mesdite paralajmërimin nga i kuq në portokalli, por fenomenet e forta — reshje dhe stuhi në Egje, Evi, Sporade, Dodekanez dhe Kretë, me erëra veriore deri në 8–9 boforë — pritet të vazhdojnë deri në mbrëmje vonë, ndërsa autoritetet u bëjnë thirrje qytetarëve të ndjekin udhëzimet e mbrojtjes civile.