Trazirat në Burundi, vriten dy protestues
Dy persona janë vrarë gjatë demonstratave në Burundi këtë të hënë në kryeqytet. Ata kërkojnë që presidenti Pierre Nkurunziza të mos rikandidojë për një mandat të tretë.
Demonstruesit bllokuan rrugët dhe u vunë flakën gomave në disa lagje të Bujumbara. Pati përleshje me policinë e cila përdori gaz lotsjellës dhe ujë për ti shpërndarë. Në ndihmë të policisë ka mbërritur edhe ushtria për të vendosur rendin.
Që prej 25 prillit kur Nkurunziza bëri publik kandidaturën e tij, për zgjedhjet e qershorit, gjashtë persona janë vrarë në vendin afrikan. Qeveria i ka quajtur protestat të paligjshme dhe e ka cilësuar ‘kryengritje’.
Shtetet e Bashkuara, vendet evropiane dhe ato rajonale i kanë kërkuar Nkurunziza të tërhiqet. Ata thonë se rrezikohet të shkelet marrëveshja e paqes e Arusha, e cila i dha fund luftës civile etnike në 2005, dhe mbajti vendin të qetë për një dekadë.
