Triantopoulos nuk do të kandidojë në zgjedhjet e ardhshme pas dërgimit në Gjykatë Speciale për Tempin
Ish-zëvendësministri për krizën klimatike, i dërguar të martën në Gjykatë Speciale për ndërhyrjen e dyshuar në vendngjarjen e aksidentit të Tempit, njoftoi se nuk do të kandidojë në zgjedhjet e ardhshme të përgjithshme.
Deputeti i Nea Demokratia-s, Christos Triantopoulos, njoftoi të martën se nuk do të kandidojë në zgjedhjet e ardhshme të përgjithshme në Greqi, siç njofton eKathimerini, pasi të njëjtën ditë ai u dërgua në Gjykatë Speciale në lidhje me ndërhyrjen e dyshuar në vendngjarjen e aksidentit hekurudhor të Tempit të vitit 2023.
Triantopoulos, ish-zëvendësministër për krizën klimatike dhe mbrojtjen civile, i mohon kategorikisht akuzat. Ai ka deklaruar se roli i tij kufizohej në koordinimin e ndihmës shtetërore dhe në informimin e publikut, duke mohuar se ka urdhëruar derdhjen e asfaltit në vendngjarje apo heqjen e rrënojave, dhe ka bërë të ditur se do ta kundërshtojë dërgimin e tij në gjyq.
Në Gjykatë Speciale për të njëjtën çështje u dërguan edhe katër zyrtarë të tjerë: ish-guvernatori i Thesalisë, Kostas Agorastos, ish-sekretari i përgjithshëm i mbrojtjes civile, Vasilis Papageorgiou, shefi i policisë Agapios Harakopoulos dhe zyrtari i shërbimit zjarrfikës, Evangelos Falaras.
Aksidenti hekurudhor i Tempit ndodhi më 28 shkurt 2023 dhe la pas 57 të vdekur, një nga tragjeditë më të rënda në historinë e hekurudhave në Greqi, që ka mbetur në qendër të debatit politik në vend.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.