Trump akuzon Huthitë se po përpiqen të rrisin çmimet e naftës para zgjedhjeve të mesmandatit

Presidenti Donald Trump akuzoi të martën militantët Huthi të Jemenit se po përpiqen qëllimisht të rrisin çmimet e naftës përpara zgjedhjeve të mesmandatit në Shtetet e Bashkuara dhe i paralajmëroi se nuk do t’i harrojë sulmet e tyre ndaj Arabisë Saudite, siç njofton Reuters. Deklarata vjen në mes të një konflikti rajonal që po zgjerohet, i nxitur nga lufta e SHBA-së me Iranin.

Në një postim në Truth Social, Trump shkroi se Huthitë po sillen shumë keq dhe i akuzoi se kanë rifilluar sulmet me nxitjen e Iranit, pas një periudhe qetësie relative që pasoi sulmet amerikane në Jemen vitin e kaluar. Ai theksoi se do të jetë në detyrë edhe pas zgjedhjeve të 3 nëntorit dhe se nuk do të harrojë.

Paralajmërimi pasoi një seri sulmesh të Huthive ndaj Arabisë Saudite, përfshirë sulmet ndaj aeroportit ndërkombëtar “King Khalid” në Riad, ku kanë humbur jetën të paktën 13 persona, janë plagosur më shumë se 300 dhe aeroporti është mbyllur.

Më herët të martën, Trump u tha gazetarëve se mund t’i kërkojë presidentit turk Tayyip Erdogan të ndërhyjë në mbështetje të interesave saudite, duke shtuar se beson që Erdogan do të bënte atë që ai i kërkon.

Huthitë kontrollojnë pjesë të mëdha të Jemenit dhe luftojnë qeverinë e mbështetur nga Arabia Saudite që nga viti 2014. Përshkallëzimi i sulmeve ndaj transportit tregtar në Detin e Kuq dhe në ngushticën Bab al-Mandab ka rritur shqetësimet për ndërprerje të furnizimit botëror me naftë dhe për çmime edhe më të larta të energjisë, me naftën mbi 100 dollarë për fuçi pak javë para zgjedhjeve.