Trump në tubimin e Tenesit: Ngushtica e Hormuzit mund të quhet “Trump Strait”, hedh edhe idenë e “Trump Ocean”

Clarksville, Tenesi — Presidenti amerikan Donald Trump mbajti të shtunën, më 10 tetor, një tubim elektoral në F&M Bank Arena në Clarksville, në kuadër të fushatës për zgjedhjet e mesmandatit, ku propozoi ta riemërojë Ngushticën e Hormuzit si “Trump Strait” dhe bëri shaka për ta quajtur një oqean të tërë “Trump Ocean”, siç njofton The Tennessean.

Trump doli në skenë rreth orës 3:20 pasdite, sipas kohës lokale, i prezantuar nga muzikanti Kid Rock dhe nën tingujt e këngës “God Bless the USA”, raporton The Tennessean. Ai tha se kishte ardhur në Tenesi “për të shpërblyer” mbështetësit e tij, ndërsa pretendoi fitore në shtet në zgjedhjet e viteve 2016, 2020 dhe 2024. Trump deklaroi se senatori Bill Hagerty dhe kandidatja Marsha Blackburn “do të fitojnë” dhe u kërkoi votuesve të silleshin sikur edhe ai të ishte në fletëvotim.

Duke folur për luftën me Iranin, presidenti pohoi se marina iraniane “është shkatërruar — 159 anije në fund të detit”. Më pas kaloi te propozimi i tij për riemërime gjeografike: “Po mendojmë ta riemërojmë si Trump strait”. Ai u mburr me riemërimin e Gjirit të Meksikës në “Gulf of America” dhe të Liqenit Ontario në “Lake America”, përpara se të bënte shaka se i duhet edhe një lumë e një oqean: “Po mendoja ose Atlantikun ose Paqësorin. Do ta quajmë ‘Trump Ocean’, ose ‘Ocean of the Americas’ ose diçka të tillë… Duhet ta bëjmë para se të largohem”. Trump shtoi se nuk do ta ndryshonte emrin e lumit Hudson, duke nderuar eksploruesin Henry Hudson.

Në planin ekonomik, presidenti u mburr me nivelin e ulët të papunësisë dhe me të ardhurat e amerikanëve, të cilat sipas tij “kanë arritur nivelin më të lartë të raportuar ndonjëherë”.

Tubimi shënon vizitën e dytë të Trumpit në Tenesi brenda dy javësh dhe vjen vetëm katër ditë para fillimit të votimit të hershëm për zgjedhjet e mesmandatit të 3 nëntorit. Miratimi i tij në Tenesi ka rënë së fundmi në 46%. Para tij në skenë foli senatorja Marsha Blackburn, kandidate për guvernatore, e cila u bëri thirrje mbështetësve “të sigurohen që Tenesi të mos bëhet kurrë Kalifornia”, shkruan The Tennessean.