Trump nis sot dërgimin e çeqeve prej 500 dollarësh për gati 1 milion amerikanë

UASHINGTON — Presidenti Donald Trump nis sot, të mërkurën, dërgimin e çeqeve prej 500 dollarësh për gati 1 milion amerikanë që, sipas administratës së tij, u mbingarkuan përmes bursës federale të Aktit të Kujdesit Shëndetësor të Përballueshëm (ACA) për blerjen e sigurimit shëndetësor, siç njofton USA Today.

Çeqet e Departamentit të Thesarit, së bashku me letra të nënshkruara nga vetë Trump-i që njoftojnë përfituesit, do të nisin të dërgohen tek më shumë se 950,000 amerikanë në 30 shtete, sipas një zyrtari të administratës, raporton USA Today.

«Për vite me radhë, administrata Biden ju mbingarkoi për të financuar funksionimin e HealthCare.gov», shkruan Trump në letër, kopjen e së cilës e siguroi gazeta amerikane. «Ato para u përkasin amerikanëve punëtorë, jo Qeverisë, dhe tani unë po jua kthej!»

Trump e kishte njoftuar rimbursimin prej 500 dollarësh më 10 shtator në një video të publikuar nga Shtëpia e Bardhë, që përkoi me konventën republikane të mesmandatit në Dallas. Këto para janë të ndara nga dividendi kontrovers prej 5,000 dollarësh që Trump ka premtuar t’ua shpërndajë të gjithë amerikanëve nëse republikanët mbajnë kontrollin e Kongresit pas zgjedhjeve të mesmandatit të nëntorit.

Sipas Shtëpisë së Bardhë, administrata Biden mblodhi tarifa përdorimi nga kompanitë e sigurimeve shëndetësore që konsumatorët i paguan në formën e primeve më të larta — dhe se primet tejkalonin atë që nevojitej për të drejtuar bursën. Administrata Trump e ka akuzuar administratën Biden se e la të flinte tepricën e parave, shkruan USA Today.

Çeqet, të dërguara pesë javë para zgjedhjeve të mesmandatit të nëntorit, vijnë në një kohë kur shqetësimet e amerikanëve për kostot e larta dhe përballueshmërinë përbëjnë përgjegjësi të mëdha politike për republikanët e Trump-it, që synojnë të mbajnë pushtetin në Kongres.

«Ju keni paguar në këtë Sistem të dëmtuar, dhe tani më në fund po merrni diçka mbrapsht», shkruan Trump në letër.

30 shtetet ku disa amerikanë do të marrin çeqe rimbursimi janë shtete që nuk kanë bursat e tyre të sigurimeve ACA dhe mbështeten tek bursat federale të administruara nga Qendrat për Shërbimet Medicare & Medicaid: Alabama, Alaska, Arizona, Arkansas, Delaware, Florida, Hawaii, Indiana, Iowa, Kansas, Louisiana, Michigan, Mississippi, Missouri, Montana, Nebraska, New Hampshire, North Carolina, North Dakota, Ohio, Oklahoma, Oregon, South Carolina, South Dakota, Tennessee, Texas, Utah, West Virginia, Wisconsin dhe Wyoming. Amerikanët në 20 shtetet e tjera nuk do të marrin çeqe, sepse shtetet e tyre i drejtojnë vetë bursat dhe qeveria federale nuk mblodhi tarifa përdorimi, raporton USA Today.