Tryezë mes partive? Ruçi: Nuk është momenti i duhur, e komprometon procesin
Kreu i grupit të PS-së del kundër idesë të ministrit Manjani
Nga Artemisa Hoxha
Reforma në drejtësi përplas dy partitë kryesore të koalicionit të majtë PS dhe LSI. Propozimi për uljen në një tryezë mes tre liderëve të politikës shqiptare Edi Rama, Ilir Meta dhe Lulzim Basha cilësohet si i parakohshëm për numrin një të deputetëve socialistë, Gramoz Ruçi. Kjo për faktin se Partia Socialiste i mëshon qëndrimit të saj që Reforma në Drejtësi duhet të realizohet nga ekspertët e nivelit të lartë dhe jo nga përfshirja e politikës në këtë proces me anë të tryezave. Pavarësisht se partia aleate në bashkëqeverisje, LSI, nëpërmjet ministrit të Drejtësisë, Ylli Manjani, shikon si zgjidhje të ngërçit të krijuar pas bojkotit të ekspertëve të opozitës nga grupi i punës për diskutimet në lidhje me rekomandimet e Komisionit të Venecias, për PS-në, ndërhyrja e politikës në këtë fazë do ta politizonte. Kjo duket është dhe pika që ndan dy aleatët në koalicionin qeverisës për atë që vetë Kryeministri Edi Rama e ka konsideruar kryereformë të qeverisjes së tij. Për kreun e grupit parlamentar, Gramoz Ruçi, ideja për të ulur së bashku dy drejtuesit e partive më të mëdha në koalicionin e majtë, Edi Ramën dhe Ilir Metën me atë të opozitës, Lulzim Bashën për të gjetur një zgjidhje për ecurinë e diskutimeve mes ekspertëve, nuk duket zgjidhja e duhur për momentin. Sipas tij, ndërhyrja e politikës në këtë fazë, nuk do të bënte gjë tjetër veçse ta politizonte këtë proces. “Çdo trazim në këtë moment i politikës do të politizonte, komprometonte procesin”, deklaroi Ruçi për gazetën “Shqip”. Për kreun e grupit parlamentar të PS-së, nuk ka asnjë arsye pse procesi i implementimit të rekomandimeve të Komisionit të Venecias të kalojë në ngërç duke marrë parasysh se këto rekomandime u pranuan nga vetë palët. “Nuk e gjykoj se kjo do të ishte zgjidhja e duhur në këtë moment. Duhet përshëndetur puna e arritur deri më tani e grupit të ekspertëve, si dhe mbështetur implementimi i rekomandimeve të Komisionit të Venecias, të cilat kanë marrë dakordësinë e të gjitha palëve. Në lidhje me këtë fazë ku ndodhet aktualisht procesi i reformës në drejtësi ekspertët po japin kontributin e tyre në realizimin e një drafti përfundimtar. Sigurisht, ne duam që ky proces të përfundojë sa më shpejt dhe të jetë i dakordësuar”, shprehet kreu i grupit të PS-së. Por ashtu siç ka treguar dhe eksperienca të mëparshme për çështje të caktuara që ngërçet zgjidhen nga ndërhyrja e ndërkombëtarëve ose dhe vetë ndërhyrjes së krerëve të partive më të mëdha drejtuese, edhe në këtë rast për Reformën në Drejtësi, finalizimin e saj me sukses, Ruçi nuk përjashton ndërhyrjen e politikës në rast se në fund të gjithë procesit do të duhen medoemos diskutimet mes palëve politike. “Në fund të gjithë kësaj faze që do të ecë sipas rekomandimeve të Komisionit të Venecias, të ndërhyjë politika vetëm në rast se do të ketë diçka që do të kërkojë diskutim mes palëve”, thekson Ruçi. Puna e ekspertëve ka ngecur për shkak se opozita ka paraqitur si kusht heqjen e votimit me 3/5 të anëtarëve të Gjykatës Kushtetuese, duke kërkuar një formulë të re. Kjo është kontestuar nga ekspertët e mazhorancës, të cilët nuk pranojnë ndryshimin e formulës. Për këtë çështje, PD ka kërkuar një zgjidhje politike, kalimin e negociatave teknike në nivel politik. Një gjë e tillë duket se ka gjetur mbështetje dhe te LSI-ja, e cila po jep sinjale pro organizimit të tryezave politike. Dy ditë më parë dhe kreu i grupit parlamentar të LSI-së, Petrit Vasili kërkoi konsensus politik për reformën në drejtësi, duke theksuar se ndërhyrja mund të realizohet vetëm në rast se ekspertët bien në ngërç për amendamentet kushtetuese. Ndërsa kryeparlamentari Ilir Meta të hënën e shkuar deklaroi se të gjitha partitë duhet të vijnë te Venecia sa i përket reformës në drejtësi, çka nënkupton se nuk ka një qëndrim në unison mes aleatëve kryesorë të qeverisjes së majtë.
