“Turkish Airlines” përforcon kapacitetet në Maqedoni

Kompania turke “Turkish Airlines” e cila është e pranishme në Maqedoni që nga viti 1998, hapi zyrën e re në Shkup, me qëllim të intensifikimit të bashkëpunimit në Republikën e Maqedonisë.

Drejtor i “Turkish Airlines” në Maqedoni, Ilker Baydar tha se para 18 viteve kjo kompani ka filluar me dy fluturime në javë, ndërsa sot për shkak të bashkëpunimit të mirë mes dy vendeve, ky numër ka arritur në dy fluturime në ditë. Ai theksoi se me hapjen e zyrës së re në Shkup, Turkish Airlines përforcon kapacitetin e saj.

“Zyra e cila u hap sot në Shkup dhe e cila është e pajisur në mënyrë më moderne është bërë një produkt i rëndësishëm për popullin e Maqedonisë. Për këtë zyrë kemi treguar një punë shumë serioze, me qëllim që të përforcojmë lidhjet tona kulturore dhe historike me këtë popull që jeton këtu”, tha Baydar.

Nga ana tjetër, nënkryetari i “Turkish Airlines” për Evropën Lindore dhe Ballkanin, Mert Dorman theksoi se kompania filloi me punë në vitin 1933 me pesë avion, ndërsa që nga vitit 2003 përjetoi një rritje intensive ndër kompanitë më të larta në botë. Qëllimi i kompanisë siç tha ai, është për të arritur një flotë prej 500 avionëve dhe 120 milionë klientë në tërë botën.

Në hapjen e zyrës së re i pranishëm ishte edhe ambasadori turk në vend, Ömür Şolendıl, i cili theksoi se hapja e kësaj zyre është një hap me rëndësi të veçantë për suksesin e mëtejshëm të kompanisë.

“Kompania jonë e cila vitet e fundit ka treguar një përparim të madh dhe është bërë njëra nga kompanitë më të mëdha ajrore në botë, është një burim krenarie për ne”, u shpreh Şolendıl.