Brazili miraton kujdestarinë e përbashkët për kafshët shtëpiake pas ndarjes

Senati brazilian ka miratuar një projektligj që parashikon kujdestarinë e përbashkët të kafshëve shtëpiake në rast ndarjeje mes partnerëve, shkruan republica.it.

Ky hap konsiderohet një zhvillim i rëndësishëm në njohjen e rolit emocional që kanë qentë dhe macet brenda familjeve.

Sipas draftit, në mungesë të një marrëveshjeje mes palëve, do të jetë gjykata ajo që vendos për kujdestarinë e kafshës.

Ligji përcakton kritere të qarta: koha dhe shpenzimet për mirëmbajtjen e kafshës duhet të ndahen në mënyrë të barabartë, përveç rasteve të veçanta si dhuna, ku kujdestaria e përbashkët mund të përjashtohet.

Nisma vjen në një kohë kur vendi numëron mbi 160 milionë kafshë shtëpiake, të cilat gjithnjë e më shumë konsiderohen pjesë e familjes.

Kjo pasqyron një ndryshim të thellë shoqëror dhe një rritje të vëmendjes ndaj mirëqenies së kafshëve edhe në çështjet ligjore.

Projektligji tashmë pret vendimin përfundimtar të presidentit Luiz Inácio Lula da Silva, i cili ka në dorë dekretimin e tij.

Nëse miratohet, kjo nismë mund të shërbejë si model edhe për vende të tjera.   /os/