Kina mbështet armëpushimin SHBA-Iran mes spekulimeve mbi rolin në sigurimin e marrëveshjes

Kina ka mirëpritur armëpushimin midis Iranit dhe SHBA-së, mes raportimeve se Pekini ishte i përfshirë në sigurimin e pauzës dyjavore të luftimeve dhe rihapjes së Ngushticës së Hormuzit.

“Kina ka mbështetur vazhdimisht një armëpushim dhe një zgjidhje të mosmarrëveshjeve përmes kanaleve diplomatike, dhe ka mbështetur përpjekjet për ndërmjetësim nga Pakistani dhe vendet e tjera”, tha sot zëdhënësja e Ministrisë së Jashtme, Mao Ning.

Ajo shtoi se Pekini shpreson që të gjitha palët të bashkëpunojnë për të mundësuar rifillimin e trafikut normal të transportit detar përmes Ngushticës së Hormuzit sa më shpejt të jetë e mundur.

Disa media kanë raportuar se Kina e nxiti Iranin të binte dakord për një armëpushim në konfliktin me SHBA-në dhe Izraelin në orët para se të përfundonte afati i ultimatumit të presidentit të SHBA-së, Donald Trump.

Mao nuk e konfirmoi këtë drejtpërdrejt, duke vënë në dukje se Kina dëshironte të vazhdonte të luante një rol konstruktiv në promovimin e paqes në Lindjen e Mesme.

Ndërkohë, ambasadori i Iranit në Kinë, Abdolreza Rahmani Fazli shprehu besimin se Kina dhe vendet e tjera mund të siguronin paqen në rajon, raportoi “South China Morning Post”.

Në një konferencë për shtyp në Pekin, Abdolreza Rahmani Fazli thuhet se paralajmëroi se Irani do të kundërpërgjigjej ashpër nëse SHBA-ja nuk i respektonte marrëveshjet.

Pekini konsiderohet si një aleat i rëndësishëm i Teheranit, pjesërisht pasi Kina blen sasi të mëdha nafte nga Irani. //a.i/