Turqia dhuron 10 mjete transporti për ushtarakët shqiptarë

Republika e Turqisë i dhuron 10 minibuzë Forcave të Armatosura Shqiptare, në kuadër të mbështetjes që pala turke ofron për modernizimin e tyre. Minibuzat, e prodhuar nga kompania e njohur e prodhimeve ushtarake turke “OTOKAR”, do të shërbejnë për transportimin e ushtarakëve në njësitë dhe repartet e tyre.

Ato janë pjesa e parë e një pakete të konsiderueshme mjetesh transporti, të cilat do të vihen në dispozicion të Forcave të Armatosura gjatë vitit 2015.
Me këtë rast, në mjediset e Ministrisë së Mbrojtjes u zhvillua sot ceremonia e dorëzimit të tyre, ku ishin të pranishëm ministrja e Mbrojtjes, Mimi Kodheli, shefi i Shtabit të Përgjithshëm, gjen/major Jeronim Bazo, ambasadori turk në Tiranë, Hidayet Bayraktar etj.
Ministrja Kodheli falenderoi qeverinë dhe Forcat e Armatosura turke për mbështetjen e pakursyer për Forcat tona të Armatosura, sidomos në kuadër të trajnimeve, edukimit apo dhe pajisjeve, ndërsa siguroi se ushtria shqiptare do t’i përligjë më së miri këto investime.
Ambasadori turk, Hidayet Bayraktar, nga ana e tij tha se Turqia e konsideron Shqipërinë një ndër vendet më të rëndësishëm në Ballkan dhe me mjaft influencë në stabilitetin e rajonit. Për këtë arsye, u shpreh ai, modernizimi i FA-së është një ndër prioritetet kryesore në marrëdhëniet mes dy vendeve tona.