Tusk përpara samitit: Brexit mund të anulohet
Donald Tusk e lë të hapur mundësinë që Brexit të mos materializohet asnjëherë.
Në komentet e bëra për mediat përpara samitit të BE-së, në Bruksel, presidenti i BE-së la të kuptohet se procesi mund të përmbyset, duke i ilustruar pohimet e tij edhe me disa vargje të famshme të John Lennon.
“Ca miq të mi britanikë më pyetën nëse Brexit mund të zhbëhet dhe nëse unë mund ta imagjinoja një skenar ku Britania vazhdon të mbetet pjesë e BE-së. U thashë se blloku është ndërtuar mbi ëndrra që dukeshin të pamundura për tu vënë në jetë, prandaj kush e di? Mund të më quani ëndërrimtar nëse doni, por ama nuk jam i vetmi”, ka thënë Tusk.
Britania tronditi bllokun europian kur votoi në 2016-tën për t’i dhënë fund anëtarësimit 40-vjeçar në BE.
Paraqitja katastrofike e konservatorëve të Theresa May-t në zgjedhjet e 8 qershorit, prej të cilave humbën shumicën parlamentare, i ka dhënë jetë spekulimeve se planet e Brexit mund të zbuten ose edhe të rrëzohen fare.
Presidenti francez Emmanuel Macron dhe ministri gjerman i Financave deklaruan që të dy javën e kaluar se për Britaninë, dera e qëndrimit në Bashkimin Europian vazhdon të mbetet e hapur.
