UJP nis kontrollet e hyrjeve nga jashtë për vitin 2021, qytetarëve u mbërrijnë njoftime të personalizuara

Administrata e të Ardhurave Publike (UJP) ka nisur kontrollet e hyrjeve të parave nga jashtë të realizuara gjatë vitit 2021, duke u mbështetur në të dhënat që i ka marrë nga bankat, siç njofton Ekonomija i Biznis duke iu referuar njoftimit të vetë Administratës. Personave fizikë, rezidentë të Maqedonisë së Veriut, për të cilët ka të dhëna se kanë realizuar të ardhura nga jashtë në vitin 2021, u janë dërguar njoftime të personalizuara me thirrje që brenda një afati të caktuar t’i përmbushin detyrimet e tyre tatimore.

Gjatë vitit, UJP në disa raste përmes mediave dhe informimit publik i ka thirrur qytetarët t’i përmbushin detyrimet për vitet e kaluara, duke dhënë edhe udhëzime e sqarime, ndërsa tani njoftimet e personalizuara mbërrijnë me afat konkret për veprim. Nëse detyrimet nuk përmbushen vullnetarisht, Administrata paralajmëron se do t’i ndërmarrë masat brenda kompetencave të saj ligjore për përcaktimin e tatimit.

Detyrimi për deklarim vlen për të ardhurat nga jashtë që tatohen sipas Ligjit për tatimin e të ardhurave personale: të ardhurat nga puna — rroga, honorare, shërbime intelektuale dhe punë freelance — të ardhurat nga qiraja, përfshirë edhe ato të realizuara përmes platformave si Airbnb dhe Booking.com, fitimet kapitale nga shitja e pronës, kriptovalutat dhe letrat me vlerë, të ardhurat nga kapitali si dividendët dhe kamatat, të drejtat e autorit, fitimet nga lojërat e fatit dhe lloje të tjera të ardhurash që i nënshtrohen tatimit.

Megjithatë, sipas sqarimit të UJP-së, jo çdo hyrje nga jashtë i nënshtrohet tatimit: dhuratat, mbështetja familjare, huatë dhe transferet përmes shërbimeve si Western Union, Ria dhe MoneyGram nuk përbëjnë automatikisht të ardhura të tatueshme vetëm pse vijnë nga jashtë. Trajtimi tatimor varet nga baza reale e hyrjes, prandaj qytetarët, kur është e nevojshme, duhet të kenë prova për origjinën e mjeteve. Po ashtu, jo çdo qytetar që ka marrë njoftim është i detyruar të dorëzojë llogaritje elektronike e-PPD.

UJP u bën apel të gjithë personave që kanë marrë hyrje nga jashtë ta kontrollojnë detyrimin e tyre tatimor dhe, nëse nevojitet, të dorëzojnë në kohë llogaritjen elektronike të avancës së tatimit (e-PPD) dhe ta paguajnë tatimin e përcaktuar, për të shmangur procedura eventuale kundërvajtëse ose tatimore. Udhëzimet e hollësishme për procedurën e deklarimit dhe zbatimin e marrëveshjeve për shmangien e tatimit të dyfishtë janë të publikuara në faqen e Administratës, ndërsa qytetarët mund të drejtohen edhe në info@ujp.gov.mk, në numrat 0800 33 000 dhe 02 3253 200, ose në zyrat e UJP-së sipas vendbanimit.