Ukraina çliron tre fshatra të tjerë në Donetsk, totali i kundërofensivës arrin në 16 vendbanime dhe 277 km²

Ukraina ka çliruar tre fshatra të tjerë nga forcat ruse në rajonin lindor të Donetskut, duke e çuar në 16 numrin e përgjithshëm të vendbanimeve të rimarra në kundërofensivën e saj të fundit, siç njofton Reuters. Sipas komandantit të lartë që e bëri njoftimin të mërkurën, territori i çliruar arrin tani në 277 kilometra katrorë.

Operacionin po e zhvillon Korpusi i Tretë i Ushtrisë së Kievit në veri të Slovianskut strategjik, një nga dy bastionet kryesore të brezit të fortifikimeve që mban mbrojtjen ukrainase në lindje. Sulmet e fundit u zhvilluan rreth 30 kilometra në veri të qytetit dhe janë pjesë e përpjekjes për t’i dëbuar trupat ruse nga ajo zonë, operacion i shpallur muajin e kaluar dhe i pagëzuar “Vivaldi”.

Komandanti i korpusit, gjeneral brigade Andrii Biletskyi, tha në një video-mesazh se plani i Kremlinit për të pushtuar rajonet e Donetskut dhe Luhanskut nuk do të realizohet në të ardhmen e afërt. Donetsku dhe Luhansku, të pushtuara pothuajse tërësisht nga Rusia, përbëjnë Donbasin e pasur me minerale, ndërsa Moska kërkon që Kievi t’i lëshojë edhe 20 përqindëshin e Donetskut që ende e kontrollon, para se të ndalë luftimet.

Sipas Reuters, operacioni shumë i publicizuar vjen ndërsa forcat ukrainase synojnë t’i rimarrin Rusisë iniciativën në terren në vitin e pestë të luftës, edhe duke u mbështetur në teknologji dhe taktika të reja, në një kohë kur ritmi i përparimeve ruse në fushëbetejë është ngadalësuar këtë vit. Agjencia vëren se nuk mundi t’i verifikonte në mënyrë të pavarur raportimet nga fronti, ndërsa Rusia raporton rregullisht marrjen e fshatrave në vijën e frontit.

Njoftimi për përparimin në Donetsk erdhi në të njëjtën ditë kur Kievi akuzoi kompaninë SpaceX se ka kufizuar shërbimet Starlink duke dëmtuar misionet e tij me dronë, dhe kur sulmet e reja raketore ruse lanë qindra mijëra njerëz pa energji elektrike — zhvillime që presidenti Volodymyr Zelensky i quajti mungesë respekti ndaj presidentit amerikan Donald Trump.