Vasili: Sot është ditë bashkimi

Petrit Vasili, në një konferencë për shtyp, e konsideroi votimin e djeshëm të Reformës në Drejtësi si unikal.

Ai tha se votimi me konsensus i kësaj reforme i bashkoi shqiptarët dhe i bëri të ndihen më të sigurt. Sipas tij, nga sot nis një ditë e re për politikën shqiptare, e cila tregoi se për çështje madhore mund t’i kalojë ndasitë.

Vasili gjithashtu theksoi miratimi i kësaj reforme nuk e vë në rrezik koalicionin, pasi sipas tij kjo nuk është ndarje por ditë bashkimi.

“Votimi i cili u arrit ishte sinjikativ i konsensusit patriotik dhe historik. Konsensusi i bashkoi shqiptarët, të ndihen më të sigurtë, më mirë në një atdhe që drejtohet nga një politikë që demonstroi përgjegjshmëri para një çështje madhore. Të gjithë sot janë më të qetë se projektuan një reformë për një shtet të drejtë, që prodhon barazi, qëndrim të barabartë ndaj qytetarëve para ligjit, paanshmëri që ka munguar dhe lodhur e mërzitur shqiptarët.

Për politikën shqiptare sot është një ditë e re. Politika dëshmoi përgjegjshmëri duke kaluar sprovën e çlirimit nga tabutë. Ndasitë e panevojshme janë të padobishme. Roli i SHBA ishte i pazëvendësueshëm. 

Kemi hyrë në një fazë të re, LSI do të shërbejë dhe do të jetë aktive edhe në procesin e zbatimit praktik të saj, i cili do të jetë jo i lehtë. Kryetari i Parlamentit ka patur një rol aktiv. Konsensusi nuk besoj se e rrëzon koalicionin, nuk është ndarje por ditë bashkimi.”