Vdes arkitekti i programit bërthamor
Koreja e Veriut njoftoi sot vdekjen e arkitektit të programit balistik dhe bërthamor të vendit, gjeneralit, Jon Pyong-Ho, emri i të cilit bënte pjesë në listën e personave të prekur nga sanksionet ndërkombëtare.
”Jon, i cili u tërhoq nga jeta publike në vitin 2011 vdiq si pasojë e një ataku kardiak, në moshën 88-vjeçare”, theksoi agjencia zyrtare koreanoveriore e lajmeve KCNA.
”Pheniani ka organizuar në nder të tij ceremoni kombëtare dhe kortezhi do të drejtohet nga drejtuesi i vendit, Kim Jong-Un”, theksoi agjencia e lajmeve, që nënvizoi se Jon Pyong-Ho ia ka kushtuar gjithë jetën e tij industrisë së mbrojtjes.
Këshilltar i afërt i babait të Kim Jong-Un, Kim Jong-Il, i cili drejtoi vendin deri në vdekje në muajin dhjetor 2011, ish-gjenerali drejtoi dhe mbikëqyri provën e parë bërthamore të Koresë së Veriut në tetor 2006.
Sipas faqes së internetit të ekspertizës mbi Korenë e Veriut ”NK Leadership Watch”, Jon ka mbikëqyrur zhvillimin e raketave balistike me rreze të mesme veprimi në vitet 1990 dhe ofroi plane të krijimit në Pakistan në këmbim të informacioneve të teknologjisë për pasurimin e uraniumit nga ultracentrifugimit.
Në vitin 2008 dhe 2009, Jon Pyong-Ho drejtoi dy prova të raketave me rreze të gjatë veprimi dhe provën e dytë bërthamore.
