Veliaj inspekton punimet për ndërtimin e Rrugës së Kosovarëve

Kryetari i Bashkisë së Tiranës, Erion Veliaj ka inspektuar fillimin e punimeve për ndërtimin e “rrugës së Kosovarëve”, në të cilën kishte premtuar se do të ndërhynte me investime sapo të vinte në drejtimin e qytetit.

“Më vjen mirë që jemi në këtë fazë dhe po i drejtohemi fundit të një projekti që ka një histori të gjatë dhe jo shumë të lavdishme. Fatkeqësisht, autoritetet lokale nuk i’u përgjigjen me të njëjtën monedhë bujarisë së Tiranës dhe deri dje kishim një rrugë me emër të lavdishëm, por me një histori të palavdishme”, tha kryebashkiaku Veliaj.

Ai vuri në dukje se e ka vizituar këtë rrugë edhe gjatë fushatës zgjedhore një vit më parë, duke dëgjuar ankesat e banorëve. Por, një vit më pas, projekti është zhbllokuar dhe po ecën me ritme të shpejta.

“Ne po punojmë në çdo zonë të Tiranës dhe po i shpërndajmë në mënyrë demokratike investimet e bashkisë. Më vjen mirë që për njësinë 5 kemi bërë shumë investime: po mbyllim fazën e parë të Parkut Olimpik dhe shumë shpejt do të fillojmë me fazën e dytë; tre javë më parë hapëm me sukses këndin e lodrave; nga FZHR-ja kemi fituar projektin për pistën e biçikletave dhe korsinë e vrapuesve rreth e qark Liqenit; kemi bërë mbjellje masive në jug të Liqenit, po punojmë shumë shpejt te Kombinati Ushqimor për mbikalimin. Siç e tha edhe Pandi, investimet nuk janë vetëm një mënyrë për të hapur një rrugë, por edhe një mënyrë për t’i dhënë vlerë një zone”, deklaroi Veliaj.

Deputeti i Partisë Socialiste, Pandeli Majko, i cili shoqëroi kryebashkiakun gjatë inspektimit të punimeve në Rrugën e Kosovarëve, tha se “nuk dua të bëj asnjë lloj komplimenti, por këtu puna flet vetë. Të gjitha këto që shikoni përreth do të marrin një vlerë të re, duke filluar me qiratë e shtëpive, të lokaleve dhe sidomos me lëvizjen e mjeteve. Do ta kthejë të gjithë këtë histori, së bashku me Parkun Olimpik, në një standard europian”.