Vendet vakante në Kuvend, KQZ zëvendëson 4 mandate të LSI-së
Komisioni Qendror i Zgjedhjeve vendosi sot plotësimin e katër vendeve vakante në Kuvend me katër kandidatë të Lëvizjes Socialiste për Integrim.
Në mbledhjen e sotme, Komisioni Qendror i Zgjedhjeve vendosi t’i japë mandatin e deputetit në qarkun e Tiranës kandidatit Edmond Abaz Rushi, duke zëvendësuar në këtë mënyrë deputetin e LSI-së Endrit Braimllari.
Po kështu KQZ i ka dhënë mandatin Aurora Marës nga lista e kandidatëve për deputetë të LSI-së në qarkun Dibër e cila zëvendëson ish-deputetin e Dibrës Përparim Spahiu.
Në qarkun e Elbasanit KQZ i jep mandatin e LSI-së Enver Roshi në vend të Edmond Haxhinastos.
Gjithashtu, KQZ vendosi t’i japë mandatin edhe Ylli Shehut përfaqësues i qarkut Tiranë, i cili zëvendëson Floida Kërpaçin.
Vendimet hyjnë në fuqi menjëherë dhe botohen në Fletoren Zyrtare, ndërsa kundër këtij vendimi mund të ankimohet në Kolegjin Zgjedhor brenda 30 ditëve nga shpallja e vendimit.
