Vepra “Don Gjon Buzuku dhe “Meshari” i tij” sjell në fokus një analizë mbi figurën e Gjon Buzukut

Vepra “Don Gjon Buzuku dhe “Meshari” i tij” nga Bardhyl Demirajt vlerësohet si një kontribut i rëndësishëm në fushën e albanologjisë. Promovimin e librit studimor “Don Gjon Buzuku dhe “Meshari” i tij” i autorit Bardhyl Demiraj u organizua nga Komisioni i Përhershëm i Gjuhësisë dhe i Letërsisë dhe Instituti i Gjuhësisë dhe i Letërsisë pranë Akademisë së Shkencave.

Prezantimi i librit kishte për synim të rikthente në qendër të vëmendjes rëndësinë e “Mesharit” si monumenti më i hershëm i gjuhës shqipe dhe kontributin e autorit Bardhyl Demiraj, i cili me këtë botim sjell një analizë të thelluar mbi figurën e Don Gjon Buzukut dhe trashëgiminë e tij letrare, themelore për gjuhën e kulturën tonë. Në fjalën hapëse, prof. dr. Anila Omari, theksoi se studimet albanologjike dhe veçanërisht ato buzukiane pasurohen me monografinë e re të prof. Bardhyl Demirajt. Prof. dr. Anila Omarit, u ndal te çështja e formimit teologjik-intelektual të Buzukut dhe te tekstet burimore që autori i monografisë ka identifikuar si modele mundshme të “Mesharit”. Kjo vepër ndriçon aspekte të pasqaruara ose të patrajtuara më parë të librit të parë shqip, “Mesharit” të Gjon Buzukut. Shumë çështje enigmatike që shtron përpara studiuesve libri i Buzukut, në monografi përballohen me sukses dhe analizohen me argumente plotësuese dhe me përfundime novatore.

Ndërsa Prof. dr. Evalda Paci, drejtuese e Departamentit të Studimeve Letrare, paraqiti një vështrim të saj mbi vëllimin studimor “Don Gjon Buzuku dhe “Meshari’ i tij”” (Botime Françeskane, Shkodër, 2026). Ajo e introduktoi atë si fryt të një pune shumëvjeçare, me rezultate konkrete dhe të prekshme në një numër të konsiderueshëm kontributesh shkencore, të lidhura ngushtë me një tematikë aktuale në historinë e studimeve filologjike shqiptare.