Veseli: Ta lëmë retorikën, Kosova e Shqipëria të bashkëpunojnë konkretisht

Kryetari i Kuvendit të Kosovës, Kadri Veseli tha të premten në Prishtinë se është koha e fundit që raportet Kosovë-Shqipëri të lënë pas retorikën e përgjithshme të dashurisë vëllazërore dhe të zhvillohen si raporte të bashkëpunimit dhe bashkëveprimit konkret në të gjitha fushat.

Lexoni të plotë postimin e Veselit

“Sot zhvillova një takim me Delegacion parlamentar nga Shqipëria, që mbulon çështjet e edukimit dhe ato të informimit publik në Kuvendin e Shqipërisë.

Në shumë raste vizita të tilla nuk e kanë vëmendjen e duhur të mediave të cilat rëndom vrapojnë pas krerëve institucional, por në fakt puna e vërtetë bëhet në nivel të këtyre vizitave, të cilat adresojnë për zgjidhje çështjet konkrete.

Është koha e fundit që raportet Kosovë-Shqipëri të lënë pas retorikën e përgjithshme të dashurisë vëllazërore dhe të zhvillohen si raporte të bashkëpunimit dhe bashkëveprimit konkret në të gjitha fushat. Padyshim edukimi është një ndër prioritetet kryesore në këtë drejtim”.