Vjedh një banesë dhe makinë, i riu kapet në autostradën Mamurras-Laç

Një vjedhje ka ndodhur në orët e para të mëngjesit të sotëm në Tiranë. Burime nga policia bëjnë me dije se shtetasi A.M, 32 vjeç, banues në Tiranë, i dënuar më parë për vjedhje, dyshohet të ketë hyrë në banesën e shtetasit A. R., 36 vjeç, banues në Tiranë, të cilit i ka marrë portofolin brenda të cilit dispononte dokumente të ndryshme, 12000 lekë, 600 euro, si dhe çelësat e automjetit tip “Mercedes Benz”.

Më pas ka marrë automjetin e parkuar në oborrin e banesës dhe është larguar. Si rezultat i veprimeve të shpejta të kryera nga Specialistët e Komisariatit Nr 3, është bërë e mundur identifikimi i autorit të kësaj ngjarje dhe më pas kapja dhe arrestimi i tij në autostradën Mamurras – Laç, në drejtim të automjetit tip “Mercedes Benz”.

Në cilësinë e provës materiale janë sekuestruar një automjet tip “Mercedes Benz”, një portofol me dokumente të shtetasit A. R., si dhe 200 €. Materialet procedurale i kaluan Prokurorisë Tiranë, për veprat penale “Vjedhje” dhe “Drejtimi i automjeteve në gjendje të dehur apo pa dëshmi”.