Vlorë, grabitet një bankë në qendër të qytetit

Dy persona të armatosur dhe me maska kanë grabitur këtë të hënë selinë e Bankës Kombëtare Tregtare në qendër të qytetit të Vlorës.

Tek Sheshi i Flamurit, dy personat pasi janë futur në ambjentet e bankës, kanë neutralizuar dy rojet private duke i kërcënuar me armë dhe kanë mundur të marrin paratë nga dy sportele.

Pasi kanë bërë grabitjen, autorët, të veshur me rroba kamuflazhi, kanë dalë nga banka duke u larguar në rrugicat e zonës. Nga dëshmitë paraprake të mbledhura nga agjentët e policisë rezulton se dy personat kanë qenë trupa të shëndetshëm.

Autoritetet lokale njoftojnë se uniformat blu janë duke bërë kontrolle në zonat ku mendohet se grabitësit kanë kaluar. Ndërkohë pritet të mësohet dhe shifra e saktë që është grabitur.