“WP” kryqëzon Trump: I dha informacione sekrete Rusisë

Donald Trump i ka ofruar informacione të klasifikuara ministrit të Jashtëm rus Sergei Lavrov, raportojnë mediat amerikane, të cilat hedhin sërish hije skandali mbi figurën e presidentit amerikan.

Sipas mediave, informacioni ka të bëjë me një plan të Shtetit Islamik për të kryer sulme duke përdorur lap top në avionë. Por këshilltari i Trump për sigurinë kombëtare, HR McMaster i hodhi poshtë lajmet duke i cilësuar si të pavërteta.

Trump priti ministrin Lavrov në Dhomën Ovale javën e kaluar. “Në bashkëbisedimin me të dhe ambasadorin rus në Uashington, Sergei Kislyak, ai zbuloi detaje që mund të çojnë në ekspozimin e burimit të informacionit”, shkruan “Washington Post”, që citon burime zyrtare.

Presidenti thuhet se ka dalë nga protokolli, duke zbuluar detaje mbi planin e ISIS përmes përdorimit të lap top-ëve në avionë dhe vendin ku ishte lokalizuar kërcënimi.

Sidoqoftë, nëse kjo do të ishte e vërtetë për Trump nuk do të përbënte shkelje të ligjit, pasi presidenti i Shteteve të Bashkuara ka autoritetin të deklasifikojë informacionet.

Ajo që bie në sy është se takimi mes tij dhe ministrit Lavrov erdhi një ditë pasi Trump kishte shkarkuar drejtorin e FBI-së, James Comey, që po hetonte lidhjet e tij me Rusinë.

Ndërkohë, media të tjera amerikane bëjnë me dije se informacioni është ofruar nga një partner i Shteteve të Bashkuara, të cilit nuk i ishte dhënë leje për ta ndarë atë me Rusinë.

Sipas burimeve, persona të tjerë në dijeni të këtij fakti kuptuan gabimin dhe u përpoqën të kufizonin dëmet duke informuar CIA-n dhe Agjencinë e Sigurisë Kombëtare, NSA.