Xhuvani dhe Sida transferohen në burgun e Fushë Krujës

Konstandin Xhuvani dhe Erald Sida janë transferuar nga paraburgimi i Tiranës, ku ndodheshin prej mëngjesit të së martës, në burgun e Fushë-Krujës.

Lajmi bëhet i ditur nga burime pranë Drejtorisë së Përgjithshme të Burgjeve, të cilat theksojnë se transferimi në burgun e Fushë- Krujës është bërë pas përfundimit dje të seancës gjyqësore ndaj dy të pandehurve Xhuvani dhe Sida.

Mësohet se procesi i transferimit është bërë në masa të rrepta sigurie dhe ka për qëllim mbikqyrjen më me kujdes të dy personave të përfshirë në masakrën e 4 nëntorit, ku Xhuvani akuzohet për vrasjen e katër personave, ndërsa miku i tij, Erald Sida, për moskallëzim krimi dhe prostitucion.

Ngjarja e rëndë që tërhoqi vëmendjen e të gjithë opinionit publik ndodhi rreth orës 04.00 të datës 4 nëntor, në një prej klubeve të natës në Rrugën e Elbasanit. Mëngjesin e të martës si pasojë e një konflikti të çastit Konstandin Xhuvani ka qëlluar me armë duke vrarë katër persona, 3 të rinj dhe një 60-vjeçar Italian që ndodhej në lokal dhe që nuk ishte i përfshirë në ngjarje.