Zaganjori: Korrupsioni në gjyqësor në formë të shëmtuar, duhet luftuar

Kreu i Gjykatës së Lartë, Xhezai Zaganjori duke folur për reformën në Drejtësi, tha se ajo është një domosdoshmëri.

Në lidhje me këtë reformë, Zaganjori tha se gjyqësori është I gatshëm të japë kontribut për të zhdukur korrupsionin.

Këto deklarata ai i bëri gjatë prezantimit të botimit “Standartet e gjykimit përmes vendimeve unifikuese”, organizuar nga Gjykata e Lartë.

“Gjyqësori është i gatshëm të japë kontribut. Sapo të kemi draftin e reformës do japim mendim. Korrupsioni në gjyqësor, në formë të shëmtuar, institucionet ligjzbatuese duhet ta luftojnë”.

Llalla: Të parashikohet në ligj e drejta e prokurorisë për të thirrur Kolegjet e Bashkuara të Gjykatës së Lartë

Prokurori i Përgjithshëm, Adriatik Llalla, është i mendimit se Gjykata e Lartë duhet të shtojë aktivitetin e saj në nxjerrjen e vendimeve unifikuese, për të standartizuar praktikën e gjykatave më të ulta, “vendimet e të cilave, në shumë raste, karakterizohen nga subjektivizmi dhe pse jo, edhe nga abuzivizmi”.

Gjithashtu, duke theksuar se aktualisht është koha që po diskutohet gjerësisht Reforma në Drejtësi, z. Llalla u shpreh se “shpresojmë dhe besojmë se ligjvënësi do të marrë parasysh kërkesën që Prokurorit të Përgjithshëm t’i njihet e drejta për të vënë në lëvizje Kolegjet e Bashkuara të Gjykatës së Lartë për të nxjerrë vendime unifikuese për çështje të ndryshme penale”.

Duke i dhënë këtë të drejtë ligjërisht Prokurorit të Përgjithshëm, “institucioni i prokurorisë do të jetë më aktiv në standardizimin e praktikës gjyqësore që ndihmojnë në respektimin e garantimin e të drejtave themelore të njeriut, si edhe në forcimin e shtetit ligjor në Shqipëri”, u shpreh z. Llalla.