Berati përcjell me nderime Namir Lapardhanë, i njohur si gazetar dhe figurë e njohur e jetës publike

Mes dhimbjes dhe respektit të thellë, qyteti i Beratit i dha këtë të mërkurë lamtumirën e fundit Namir Lapardhajës, një nga figurat më të njohura të jetës publike dhe kulturore në qytet.

Homazhet u zhvilluan në ambientet e Qendrës Kulturore në Berat, ku morën pjesë familjarë, miq, kolegë dhe qytetarë të shumtë. Të pranishmit ndanë kujtime dhe vlerësime për figurën e tij, duke theksuar kontributin në letërsi, gazetari dhe shoqëri, si dhe përkushtimin e tij ndaj komunitetit.

Ngushëllime të shumta mbërritën për bashkëshorten, dy vajzat, nënën dhe të gjithë familjarët e tij.

Yzedin Hima, profesor:
“Unë Namirin nuk e kam njohur thjesht si drejtor të drejtorisë arsimore, por si koleg mësues dhe në fushën e medias dhe krijimtarisë letrare. Edhe pse më i ri, ishte një bashkëbisedues i jashtëzakonshëm, me karakter të fortë, energjik dhe i mençur. Me Namirin jo vetëm që mund të bisedoje, por edhe të mësoje.”

Roland Bejko, ish-prefekt i Beratit:
“Namirin e kam njohur rreth 20 vite më parë, këtu në Berat. Ishte një djalë i brishtë dhe shumë i edukuar, por brenda kishte forcë të madhe. Me kalimin e viteve, ai u bë një figurë e rëndësishme në gazetari dhe jetën aktive të qytetit. Kur kthehesha në Berat, telefonata e parë ishte gjithmonë për Namirin.”

Publicisti Preç Zogaj e cilësoi Namir Lapardhajën një simbol të shoqërisë dhe një model për brezat e ardhshëm:

“Namiri ka moshën e djalit tim, por e kam njohur si një moshatar. Lidhja jonë u krijua përmes librave, veçanërisht përmes poezisë, dhe kjo lidhje na ka mbajtur pranë njëri-tjetrit.”

Pas homazheve, arkëmorti u përcoll për në banesën e fundit, ndërsa qyteti i Beratit i dha lamtumirën e fundit një intelektuali dhe figurë të dashur për komunitetin.

The post Berati përcjell me nderime Namir Lapardhanë, i njohur si gazetar dhe figurë e njohur e jetës publike appeared first on Euronews Albania.