Zanetti e pranon: Lautaro na shqetësoi shumë para Botërorit, nuk është mësuar me dëmtime

Javier Zanetti, zv. president i Interit dhe legjendë e klubit zikaltër, ka folur për gjendjen e Lautaro Martínez para Kupës së Botës, duke pranuar se ka pasur shqetësim për gjendjen e tij fizike.

Në një intervistë për gazetën argjentinase “La Nación”, Zanetti tha: “Lautaro ishte i shqetësuar, po. Të shqetësuar ishim edhe ne, sepse flasim për një lojtar që nuk është mësuar me dëmtime. Të gjithë ishim të shqetësuar. Lauti u kthye kundër Romës, në një moment kyç të kampionatit, luajti titullar dhe shënoi menjëherë gol”.

Ai shtoi: “Pastaj ishte ndeshja kundër Comos. Të gjithë mendonin se do të humbnim pikë mes Romës dhe Comos. Ai shënoi kundër Romës, fituam, por nuk e përfundoi mirë ndeshjen. Kjo e pengoi të luante kundër Comos dhe aty u shqetësuam edhe më shumë.

Pyesnim veten: A u dëmtua përsëri? Sa serioze është gjendja? A është e njëjta gjë? Nëse do të ishte e njëjta gjë, do të ishte alarm shumë i madh. Ai nuk luajti ndaj Comos, por skuadra fitoi dhe Lautaro u rikuperua më mirë. Më pas e mbylli sezonin në mënyrën më të mirë”.