Zelensky dhe Witkoff mbërrijnë në Oslo, Norvegjia konfirmon zyrtarisht pjesëmarrjen e të dërguarve amerikanë në bisedime

Presidenti i Ukrainës, Volodymyr Zelensky, ka mbërritur të martën në Oslo për bisedimet mbi luftën në Ukrainë, ndërsa i dërguari i posaçëm i presidentit amerikan Donald Trump, Steve Witkoff, kishte zbarkuar në kryeqytetin norvegjez pak më herët, siç njofton AnewZ duke iu referuar fotove nga aeroporti i Oslos. Mbërritjet shënojnë nisjen konkrete të raundit të ri diplomatik, i cili zhvillohet në një moment kritik për Kievin.

Qeveria norvegjeze konfirmoi zyrtarisht të martën se të dërguarit e posaçëm amerikanë Steve Witkoff dhe Jared Kushner marrin pjesë në bisedime, siç raporton AFP: Witkoff merr pjesë fizikisht në Oslo, ndërsa Kushner i ndjek diskutimet nga distanca. “Ukraina ka kërkuar që të dërguarit e posaçëm amerikanë Steve Witkoff dhe Jared Kushner t’i bashkohen takimeve. Jam i kënaqur që ata mund të marrin pjesë”, deklaroi kryeministri norvegjez Jonas Gahr Støre.

Konfirmimi zyrtar i pjesëmarrjes amerikane është elementi i ri i së martës: njoftimet e para të mikpritësve përmendnin vetëm takimin trepalësh mes Zelenskyt, Støre-s dhe presidentit finlandez Alexander Stubb, pa asnjë referencë për delegacione amerikane apo evropiane. Sipas Støre-s, qëllimi është “t’i vëmë përpjekjet diplomatike në një rrugë më konstruktive”, ndërsa Norvegjia dhe Finlanda janë të kënaqura që mund ta vazhdojnë këtë punë diplomatike.

Gjatë vizitës në Oslo, Zelensky do të pritet gjithashtu në audiencë nga Mbreti i Norvegjisë dhe do të vizitojë Storting-un, parlamentin norvegjez, ku do të takohet me presidentin e parlamentit dhe drejtuesit e partive. Në mbyllje të takimit trepalësh pritet një konferencë e përbashkët për shtyp e Zelenskyt, Stubb-it dhe Støre-s.

Bisedimet zhvillohen në sfondin e marrëdhënieve të tendosura mes Kievit dhe Uashingtonit: Ukraina ankohet për vonesa në dorëzimin e interceptuesve të paguar nga aleatët dhe për paralajmërime të munguara për sulmet ruse, ndërsa presidenti Trump e ka kritikuar publikisht Zelenskyn ditët e fundit. Sipas raportimeve të mëparshme, pas Oslos Witkoff pritet të udhëtojë në Rusi për një takim me presidentin Vladimir Putin.