Zelensky: Rusia mund të përshkallëzojë sulmet ajrore në Ukrainën perëndimore dhe të vendosë raketa balistike në Bjellorusi

Presidenti i Ukrainës, Volodymyr Zelensky, tha të shtunën se Rusia mund të përshkallëzojë sulmet ajrore në Ukrainën perëndimore, duke paralajmëruar se Moska mund të vendosë sisteme raketash balistike në Bjellorusi, siç njofton Reuters.

Në një bisedë me gazetarët në një chat në WhatsApp, Zelensky tha se Rusia do të donte të staciononte sisteme raketash balistike në Bjellorusi, gjë që do të rriste kërcënimin ndaj rajoneve perëndimore të vendit.

Kreu i shtetit ukrainas u bëri thirrje aleatëve të Kievit për më shumë mbështetje në fushën e mbrojtjes ajrore, përballë këtij kërcënimi në rritje.

Ukraina perëndimore ndodhet larg vijës së frontit dhe ka shërbyer si një strehë relative gjatë më shumë se katër vjetëve të luftës, me shumë njerëz dhe biznese që janë zhvendosur atje, vë në dukje Reuters.