Zelensky: SHBA-ja ka rifilluar ndarjen e inteligjencës me Ukrainën pasi e bllokoi për rreth tri ditë

Presidenti i Ukrainës, Volodymyr Zelensky, ka zbuluar se Shtetet e Bashkuara e kanë rifilluar ndarjen e inteligjencës me Ukrainën, pasi ajo u bllokua për rreth tri ditë dhe e la vendin pa paralajmërime për sulmet ruse me raketa balistike. Siç njofton New York Post, Zelensky e bëri deklaratën në një intervistë të regjistruar paraprakisht për emisionin “Meet the Press” të NBC News, e transmetuar të dielën.

“U bllokua për njëfarë kohe. Pastaj u zhbllokua nga pala amerikane. Jemi shumë mirënjohës për këtë. Tani funksionon”, tha Zelensky. Ai shtoi se Ukraina është mirënjohëse që ndërprerja, e cila e dobësoi aftësinë e vendit për t’u përgatitur për sulmet, ka marrë fund.

Zelensky shpjegoi edhe pasojat praktike të bllokimit: “Nuk i shihnim sulmet e Rusisë me raketa balistike. Kemi dhjetëra vende që na ndihmojnë, por vetëm Shtetet e Bashkuara e kanë këtë inteligjencë unike për t’i thënë palës sonë kur Rusia përdor raketa balistike. Dhe nuk e morëm gjatë sulmeve balistike për tri ditë.”

Sipas New York Post, ndërprerja e ndarjes së inteligjencës erdhi mes mosmarrëveshjeve mes Kievit dhe Uashingtonit për sulmet ukrainase ndaj infrastrukturës energjetike ruse, të cilat presidenti Donald Trump i ka fajësuar për rritjen e çmimeve të karburantit. Një javë më parë Trump shpalli një armëpushim energjetik që e zuri Kievin në befasi; Ukraina tha se i ndali për disa ditë sulmet ndaj objektivave energjetike ruse, por i rifilloi ato pasi Rusia vazhdoi të bombardonte objektet e saj energjetike.

Ukraina ka shënuar përparime të dukshme në luftimin e dronëve rusë dhe në kryerjen e sulmeve të saj me dronë, por vazhdon të ketë vështirësi kundër raketave balistike ruse, edhe për shkak të mungesës së interceptorëve Patriot, të cilët sipas raporteve kanë mbaruar së fundmi. Paralelisht, Kievi pretendon se aksesi i tij në versionin ushtarak të Starlink është kufizuar, me pretendime kontradiktore se kush e urdhëroi kufizimin dhe nëse shërbimi është rikthyer plotësisht. I pyetur pse Trump duket se flet me tone më të buta për presidentin rus Vladimir Putin sesa për të, Zelensky tha se kjo mund të lidhet me ndershmërinë e tij: “Unë jam shumë i ndershëm me Presidentin e Shteteve të Bashkuara dhe shumë i qartë… Ai [Putini] është një vrasës.”