Ambasada e SHBA-së përgëzoi Altin Dumanin për zgjedhjen si kryeprokurori i ri i SPAK-ut. Në një deklaratë për shtyp ambasada amerikane theksoi se “të tre kandidatët, Dumani, Adnan Xholi dhe Edvin Kondili, janë shumë të kualifikuar dhe meritojnë respekt të plotë në përpjekjet e tyre. Presim me kënaqësi të punojmë ngushtë me të gjithë ata”.
“Për të çuar përpara Memorandumin e Presidentit Biden në Përcaktimin e Luftës kundër Korrupsionit si një Interes Thelbësor i Sigurisë Kombëtare të Shteteve të Bashkuara (qershor 2021), ne do të vazhdojmë të mbështesim zbatimin e reformës në drejtësi. Presim me kënaqësi të mbështesim zotin Dumani dhe SPAK-un, ndërsa ata vazhdojnë luftën kundër korrupsionit dhe krimit të organizuar”, theksoi ambasada.
Ambasada e SHBA-së u shpreh se “puna e SPAK-ut duhet të vazhdojë të demonstrojë që askush nuk është mbi ligjin. Koha e pandëshkueshmërisë ka marrë fund. Reforma në drejtësi nuk është vetëm një kusht për anëtarësimin në BE, është një kërkesë e drejtë e popullit shqiptar. Shtetet e Bashkuara do qëndrojnë gjithnjë krah popullit shqiptar”.
Më tej ambasada amerikane falënderon Këshillin e Lartë të Prokurorisë për një proces përzgjedhës, i cili pati qëllim të siguronte integritetin e procesit.
“Është thelbësore për institucionet e drejtësisë që të veprojnë me integritet, pa frikë apo favore. Vlerësojmë shumë zotin Kraja për udhëheqësinë dhe përkushtimin e tij si Kryeprokurori i SPAK. Ai vendosi themele të forta mbi të cilat pasardhësit e tij mund të ndërtojnë”, tha ambasada amerikane.
KLP zgjodhi dje me 5 vota pro prokurorin Altin Dumani si drejtues të ri të SPAK, i cili zëvendëson në këtë detyrë Arben Krajën.
Pa monitorimin e Amerikes Shqiperia do ishte ne vend numero per nivelin e korrupsionit ne drejtesi.
Perse cdo individ qe emerohet ne drejtesi duhet me doemos te kete aprovimin e ambasades amerikane?