Zjarr i madh në një kompani riciklimi në Diavata të Selanikut, tymi mbulon pothuajse gjithë qytetin

Një zjarr i madh shpërtheu në orët e para të mëngjesit të së hënës në një kompani riciklimi në Diavata të Selanikut, duke mbuluar me tym të dendur pothuajse gjithë qytetin. Siç njofton ERT News, zjarri shpërtheu rreth orës 04:00 në hapësirën e jashtme të kompanisë, ndërsa Qendra e Operacioneve e Shërbimit Zjarrfikës u njoftua rreth orës 04:45 dhe në vendngjarje u dërguan menjëherë forca të shumta.

Kompania ndodhet në zonën industriale të Diavatës, mes rrugës së vjetër kombëtare, instalimeve të Hellenic Petroleum dhe rrugës Egnatia, siç raporton edhe NewsIT. Automjetet zjarrfikëse shkojnë e vijnë pa ndërprerje në vendngjarje, ndërsa zjarri mbetet aktiv dhe tymi ndihet në një pjesë të madhe të Selanikut, me një erë mbytëse që ka mbuluar atmosferën.

Në operacionin e shuarjes marrin pjesë 18 zjarrfikës me 6 automjete, të ndihmuar edhe nga Bashkia e Deltës, e cila ka vënë në dispozicion autobote uji dhe mjete pune. Sipas raportimeve të mediave greke, vështirësia kryesore lidhet me materialet që po digjen: në ambientet e riciklimit janë grumbulluar sasi të mëdha plastike dhe sendesh voluminoze, ndaj për shuarjen duhen sasi të mëdha uji dhe mbulime me dhe, prandaj operacioni pritet të jetë i vështirë dhe i gjatë.

Pranë vatrës së zjarrit nuk ka shtëpi apo biznese të tjera dhe, duke qenë zonë industriale ku njësitë janë në distancë nga njëra-tjetra, rreziku i përhapjes vlerësohet i kufizuar. Ndërkohë, për zbardhjen e shkaqeve është mobilizuar Njësia Hetimore për Krimet e Zjarrvënies e Selanikut, e cila do të shqyrtojë rrethanat e shpërthimit të zjarrit sapo kushtet në terren ta lejojnë.