Zjarr në rafinerinë e Ryazanit pas sulmit masiv ukrainas me dronë, guvernatori Malkov: dëmet po vlerësohen

Një sulm i madh ukrainas me dronë ndaj rajonit rus të Ryazanit shkaktoi të enjten zjarr në një rafineri nafte, siç njofton Reuters, duke cituar guvernatorin rajonal Pavel Malkov.

Malkov shkroi në Telegram se dëmet materiale po vlerësohen dhe se shërbimet e emergjencës po punojnë në vendngjarje. Sipas tij, edhe një depo në një vend tjetër u dëmtua, pa dhënë detaje të tjera. Më herët të enjten, ai kishte njoftuar anulimin e mësimit në shkolla dhe kopshte në dy rrethe, për shkak të sulmeve masive me dronë.

Rafineria e Ryazanit është në pronësi të gjigantit rus Rosneft dhe furnizon Moskën me karburant. Ajo përbën pothuajse 5% të kapacitetit total të përpunimit të naftës në Rusi dhe është goditur disa herë me dronë në muajt e fundit.

Ky është sulmi i parë ukrainas ndaj një objekti energjetik rus që kur presidenti amerikan Donald Trump njoftoi të dielën se Rusia dhe Ukraina kishin rënë dakord për një armëpushim energjetik, një marrëveshje që asnjëra palë nuk e ka konfirmuar.

Sulmi vjen në të njëjtën ditë kur presidenti ukrainas Volodymyr Zelensky i tha Financial Times se Ukraina i kishte ndalur sulmet energjetike për tre ditë, për t’iu bindur dëshirës amerikane, por do t’i rifillonte, sepse Rusia vazhdon të godasë infrastrukturën energjetike ukrainase.