AAB: Bankat tregtare në vend po rrisin kreditimin e ekonomise
Bankat tregtare nëv end po rrisin kreditimin e ekonomisë edhe gjatë tre muajve të parë të këtij viti.
Të dhënat e paaudituara nga Shoqata Shqiptare e Bankave treguan se “BKT” dhe “Credins” vijuan të udhëheqin rritjen e kredisë së ekonomisë edhe për këtë tremujor.
Në vlerë absolute, “BKT” e rriti portofolin e kredisë me 2.7% në tre muaj. Po aq dinamike ngelet edhe “Credins”, që në tre muaj e rriti portofolin e kredisë me 3% që nga fillimi vitit.
Ndërkohë, “Raiffeisen” ka mbajtur një qëndrim të kujdesshëm në tremujorin e parë të vitit, duke pësuar një rënie të lehtë në portofolin e kredisë. Megjithë rënien e pjesës së tregut, “Raiffeisen” ngelet e dyta, me 19.4% të totalit të kredisë të dhënë nga sistemi bankar. Një strategji të ngjashme po ndjek edhe Intesa Sanpaolo, që për momentin nuk është shumë e fokusuar te rritja.
Për 3-mujorin, pjesa e Intesa në tregun e kredisë ra në 7.5%, nga 7.7% që ishte në fund të vitit 2015. Nga bankat e grupit të dytë për nga madhësia, “Societe Generale” dhe “Union Bank” po konfirmohen si më aktivet dhe më konstantet në tendencën e rritjes. Për tremujorin, “Societe Generale” e rriti portofolin e kredisë me 3.9%, ndërsa “Union Bank” me 4.8%.
