Abilaliaj, çfarë po ndodh kështu!

Partizani nuk po arrin më të fitojë dhe 1-1 kundër Skënderbeut, në Arenën e Demave regjistroi barazimin e pestë radhazi të të kuqve në një kampionat që po dominohet nga Egnatia. Jo se distanca është e paarritshme, sepse vetëm 3 janë pikët që ndajnë dy formacionet, port ë shohësh kampionët në fuqi që nuk fitojnë prej 5 ndeshjesh tërheq vëmendjen. Arbër Abilaliaj, Drejtori Sportiv që u pozicionua në pankinë, nuk po arrin të gjejë zgjidhjen dhe pak mund të gjejnë justifikim mungesat, që duhet thënë, kanë qenë të shumta.

Diçka nuk funksionon e dëshmuar nga katër rezultat 1-1 dhe një 0-0 tre nga të cilat brenda mureve mike. Kalendari në këtë rast nuk ka qenë i butë me dy derbi e një përplasje me kryesuesit në Rrogozhinë, port ë kuqtë nuk kanë fituar dot as me Teutën e vendit të fundit dhe së fundmi Skënderbeun, për më tepër kur kishte rikuperuar lojtarë të rëndësishëm. Ndoshta problem duhet parë më thellë, sepse ndoshta edhe sinjalet janë dhënë më herët.

Seria e pesë barazimeve erdhi vërtetë pas asaj të pesë fitoreve, që kur Abilaliaj u ul në pankinë, por aty ka një detaj që flet qartë: katër nga pesë fitoret e Partizanit janë arritur në kohën shtesë, kur barazimi ishte një hap larg. Në derbin e fituar 2-1 me Tiranën, ku Abilaliaj debutoi Mensah shënoi në minutën e 92’. Sulmuesi u përsërit edhe në 1-2 me Erzenin, duke shënuar në minutën e 89’.

Ndeshjen me Teutën, 0-1 e vendosi Keko në minutën e 92’ dhe atë me Laçin, po 0-1 e zgjidhi Taipi në të 94’. Diferencë bën vetëm dominimi absolut në 4-1 ndaj Vllaznisë, i vetmi rezultat që nuk ka vend për interpretim.