Aeroporti i Prishtinës ‘Adem Jashari’ renditet i dyti në World Travel Awards 2015

Aeroporti Ndërkombëtar ‘Adem Jashari’ ka marrë çmimin e dytë në World Travel Awards 2015, ku ishte nominuar në mesin e aeroporteve më të mira të botës.

Ky nominim u bë në bazë të investimit të fundit në terminalin e ri të aeroportit dhe objektet përcjellëse, trendit të rritjes së numrit të udhëtarëve dhe fluturimeve, sistemeve të teknologjisë së fundit në treg dhe ndikimit ndaj ambientit në trajtimin e ujit. Po ashtu për bazë ishin marrë edhe performanca në kohë e procesimit të udhëtarëve dhe fluturimeve etj.

Mirëpo, ajo që solli në fitore ishin pikërisht votat e qytetarëve të Kosovës dhe diasporës kosovare.

“Ne menaxhuam të arrijmë deri te nominimi, por asnjëherë nuk do të renditeshim në vendin e dytë pa votat e udhëtarëve tanë që shumicën e përbëjnë diaspora. Prandaj, jemi mirënjohës dhe ju falenderojmë për përkrahjen tuaj gjatë këtij votimi. Ne do të vazhdojmë të jemi të përkushtuar që të ofrojmë shërbime cilësore për të gjithë klientët tanë” – tha Drejtori Gjeneral i ANP ‘Adem Jashari’ Haldun Firat Kokturk me këtë rast.

ANP ‘Adem Jashari’ meqenëse është renditur i dyti pas aeroportit të Cyrih-ut së bashku me Aeroportin e Lisbonës duke lënë pas shumë aeroporte të njohur botërore, për këtë vit është ominuar automatikisht për t’u votuar.

Duhet theksuar se asnjë nga aeroportet rajonale nuk është nominuar asnjëherë në këtë garë ndërkombëtare.

Prandaj besojmë se qytetarët e Kosovës do të votojnë përsëri dhe do ta vënë ANP ‘Adem Jashari’ në vendin e parë aty edhe ku e meriton të jetë.