Aeroporti i Vlorës, Qeveria miraton projektligjin për ndërtimin
Këshilli i Ministrave e miratoi projektligjin për kontratën e ndërtimit të Aeroportit të Vlorës. Projektligji autorizon Ministrinë e Financave dhe atë të Infrastrukturës të negociojnë ofertën e kompanive turke për ndërtimin e Aeroportit të Vlorës.
“Fillohet me një proces shumë të rëndësishëm katër vite më parë, që qe çlirimi i hapësirës ajrore nga monopoli. Kjo krijoi mundësinë dhe rriti interesin e kompanive të huaja për të investuar në një aeroport të dytë, shumë më modern se Rinasi, edhe më i madh sesa Rinasi”, thotë ministri i Infrastrukturës, Damian Gjiknuri.
Aeroporti i Vlorës do të kushtojë 100 milionë euro dhe do të ndërtohet me paratë e kompanive private.
“Qeveria shqiptare është duke punuar intensivisht edhe për krijimin e akseseve të tjera dhe vënien në funksionim të Aeroportit të Kukësit dhe ne shpresojmë që shumë shpejt të kemi një zgjidhje optimale edhe për të, por njëkohësisht po përfundojmë studimin e fizibilitetit për Aeroportin e Sarandës, që do të jetë edhe ky një nyje e rëndësishme”, deklaroi Gjiknuri.
Sipas Qeverisë, ndërtimit i Aeroportit të Vlorës pritet të fillojë brenda këtij viti.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.