Tragjedi në festën kombëtare të Turqisë, shembet masivi shkëmbor në Kapadokia! Viktima dhe të plagosur (VIDEO)

Një situatë alarmante është regjistruar në Kapadokia të Turqisë mesditën e së enjtes, pasi një nga formacionet shkëmbore karakteristike të zonës, të njohura si “oxhaqet e zanave”, u shemb në hyrje të muzeut në natyrë të Goremes.

Sipas informacioneve të mediave turke, nga shembja ka viktima dhe të plagosur, por deri më tani nuk është bërë i ditur numri i saktë i tyre apo shkalla e rëndësisë së plagëve të të lënduarve.

Në raportimet e para, guvernatori i zonës foli për të paktën dy viktima dhe një të plagosur.

“Ne kemi nxjerrë trupat e pajetë të dy personave që humbën jetën për shkak të rënies së shkëmbinjve, si pasojë e një rrëshqitjeje dheu. Një të plagosur e kemi transportuar në spital për trajtim. Operacionet e kërkim-shpëtimit vijojnë në vendngjarje”, deklaroi ai.

Në vendngjarje janë dërguar ekipe të shumta shpëtimi dhe ambulanca, ndërsa operacionet e shërbimeve të emergjencës vijojnë. Shkaqet e shembjes ende nuk janë sqaruar.

Shembja ndodhi në një ditë me fluks të lartë vizitorësh, pasi e enjtja është festë kombëtare në Turqi, me rastin e përvjetorit të shpalljes së Republikës së Turqisë.

Shumë qytetarë kishin zgjedhur ta shfrytëzonin ditën e pushimit për të udhëtuar drejt Kapadokias, ku muzeu në natyrë i Goremes është një nga atraksionet më të rëndësishme turistike të zonës.

Formacionet karakteristike shkëmbore të Kapadokias, të njohura si “oxhaqet e zanave”, janë krijuar nga erozioni i shkëmbinjve vullkanikë gjatë mijëra viteve.

Goreme është i njohur ndërkombëtarisht për këto formacione, si dhe për kishat dhe manastiret historike të gdhendura në shkëmbinj. Zona është pjesë e Listës së Trashëgimisë Botërore të UNESCO-s.

Kapadokya’da peribacası yıkıldı… Nevşehir’in merkez ilçeye bağlı Göreme beldesinde peribacası yıkıldı. Olay yerine çok sayıda ambulans sevk edildiği öğrenildi. https://t.co/vIpa2dYzA2