Aksidenti tragjik në Durrës, Balla: Moment që kërkon reflektim të menjëhershëm nga të gjitha forcat politike

Kreu i Grupit Parlamentar të Partisë Socialiste, Taulant Balla, ka reaguar nga foltorja e Kuvendit lidhur me tragjedinë e ndodhur në Durrës, ku dy të mitur humbën jetën si pasojë e një aksidenti të shkaktuar nga drejtuesi në gjendje të dehur.

Balla e cilësoi ngjarjen e rëndë si një moment që kërkon reflektim të menjëhershëm nga të gjitha forcat politike, duke theksuar nevojën për rishikim të mënyrës së zbatimit të ligjeve ekzistuese.

“Mbështes plotësisht nevojën që kemi për të reflektuar të gjithë, të majtë, të djathtë, socialistë e demokratë. Ngjarja e djeshme na kërkon që të fillojmë të kuptojmë si zbatohen ligjet tona. Nëse ne mjaftohemi me heqjen e pikëve në patentë, kjo është e rëndë për ne”, u shpreh Balla.

Ndër të tjera, Balla theksoi nevojën e rishikimit të Kodit Penal.

“Prandaj, po diskutoja për këtë dhe me kryetarin e Komisionit të Ligjeve, teksa jemi në fazën e rishikimit penal, Gjykata e Lartë e SHBA-së, ka vendosur konceptin e vrasjes në kushtet e vetëbesimit të tepruar. Përgjigja jonë në këtë rast duhet të jetë e menjëhershme sapo të kemi mundësinë që të ndryshojmë Kodin”, deklaroi ai.

Kreu i Grupit Parlamentar të Partisë Socialiste i bëri gjithashtu thirrje Policisë së Shtetit për rritje të kontrollit ndaj drejtuesve problematikë të mjeteve.

Më herët, deputeti i PS Erion Braçe kërkoi ashpërsim të Kodit Rrugor dhe atij Penal për ta konsideruar si vrasje me dashje vdekjen e dy të miturve.

Nga aksidenti i rëndë humbën jetën dy fëmijë të moshës 10 dhe 12 vjeç, ndërsa një tjetër mbeti i plagosur rëndë. Drejtuesi i automjetit që shkaktoi aksidentin e rëndë rezultonte i dehur. Ai u arrestua nga policia ndërsa mësohet se ai kishte pasur më herët probleme me shkelje të rregullave të qarkullimit.