Alarm për bombë, evakuohet parlamenti anglez
Një pjesë e parlamentit britanik është evakuuar ditën e sotme pas sinjalizimit për dy pako të dyshimta në zyrat e disa ligjvënësve.
Një zëdhënëse e policisë metropolitane të Londrës, tha se një godinë zyre përballë Dhomave të Parlamentit dhe Westminster , është evakuuar ndërsa policia ka filluar hetimet, duke parë se u dyshua për një alarm për bombë. Pas kontrollit, çdo gjë rezultoi se ishte një alarm fals.
Policia mbërriti menjëherë në vendngjarje, ku hyrje-daljet që të çonin drejt stacioneve u mbyllën dhe agjentë të policisë dhe forcat speciale zunë pozicione të ndryshme afër ndërtesës së parlamentit.
Niveli i kërcënimit të sigurisë në Britaninë e Madhe u ngrit në shkallën e tij të dytë më të lartë në gusht të këtij viti pas kërcënimeve të paraqitura nga luftëtarët e shtetit islamik që kthehen nga Iraku dhe Siria. Analistë të sigurisë thonë se luftëtarët e huaj në Irak dhe Siri tani janë me mijëra dhe rreziku i kthimit në Angli është i madh.
Muajin e kaluar, ushtarë të armatosur ishin vendosur në një atraksion turistik të lartë në zemër të selisë së qeverisë së Londrës, si një masë parandaluese, pasi një person i armatosur islamik kishte sulmuar parlamentin kanadez.
