Ambasada e SHBA-së i kërkon Prokurorisë së Lartë t’i marrë mbrapsht dy ‘Nissan Qashqai’: përdoreshin për rehati personale, jo kundër korrupsionit

Ambasada e Shteteve të Bashkuara në Beograd i ka kërkuar Prokurorisë së Lartë të Beogradit (VJT) t’ia marrë mbrapsht dy automjetet e shtrenjta “Nissan Qashqai” që ia kishte dhuruar vite më parë Departamentit të Posaçëm për Luftimin e Korrupsionit (POSK) — për shkak të keqpërdorimit dhe shkeljes së kontratës së donacionit, siç njofton Nova.rs.

Sipas burimeve të Nova.rs, makinat nuk përdoreshin për qëllimet për të cilat ishin dhuruar, por për rehati personale të drejtuesve të VJT-së: kreu i VJT-së, Nenad Stefanović, ia kishte dhënë zëvendësit të tij të parë, Miodrag “Mića” Markoviçit — i cili e përdorte atë edhe për qëllime private — si dhe prokurorit Nikola Uskokoviç, ish-zëvendëses Brankica Mariç dhe ish-shefes së POSK-ut, Jelena Ziljkiç.

Pas konstatimit të shkeljes, Ambasada kontaktoi Prokurorinë Supreme, të udhëhequr nga Zagorka Dolovac, e cila reagoi menjëherë: dy makinat u dërguan si donacion te POSK-u në Nish dhe në Kraljevë.

Konfirmim zyrtar për rastin nuk ka: as VJT-ja, as Prokuroria Supreme, as Ambasada e SHBA-së nuk u janë përgjigjur pyetjeve të dërguara, por Nova.rs thotë se pretendimet janë vërtetuar nga disa burime jozyrtare.