AMSTERDAM – Thatësira godet Holandën, autoritetet shpallin mungesë uji

AMSTERDAM, 17 korrik /ATSH-AA/ – Holanda shpalli zyrtarisht mungesë uji pas javësh me thatësirë të vazhdueshme, duke bërë që autoritetet të rrisin nivelin kombëtar të reagimit ndaj thatësirës, raportoi transmetuesi publik holandez NOS.

Ministria e Infrastrukturës dhe Menaxhimit të Ujërave e ngriti nivelin e reagimit në Nivelin 2, pas rekomandimit të Komitetit Kombëtar të Koordinimit për Shpërndarjen e Ujit, pasi mungesa e ujit pritet të vazhdojë edhe në javët e ardhshme.

Sipas masave, përparësi do t’i jepet mbrojtjes së digave kundër përmbytjeve dhe digave të ndjeshme ndaj thatësirës, pasuar nga furnizimi me ujë të pijshëm dhe prodhimi i energjisë.

Autoritetet rajonale, sipas raportimeve, do të vendosin nëse nevojiten kufizime shtesë, ndërsa Limburgu tashmë ka kufizuar përdorimin e ujërave sipërfaqësore për qëllime që përfshijnë ujitjen e tokave bujqësore.

Rijkswaterstaat, agjencia ekzekutive e Ministrisë holandeze të Infrastrukturës dhe Menaxhimit të Ujërave, tha se nuk ka rrezik për furnizimin publik me ujë të pijshëm, por u bëri thirrje qytetarëve ta përdorin ujin me përgjegjësi gjatë periudhës së thatë.

Prurja e lumenjve në Holandë ka rënë në nivelin më të ulët që nga viti 1976 në Lobith.

Komiteti Kombëtar i Koordinimit për Shpërndarjen e Ujit tha se mungesa aktuale e ujit është më e rëndë se zakonisht dhe paralajmëroi se rreziku nga thatësira është rritur gjatë dekadave të fundit për shkak të ndryshimeve klimatike.

Hera e fundit kur Holanda e ngriti nivelin e reagimit ndaj thatësirës në Nivelin 2 ishte në gusht të vitit 2022. Niveli më i lartë i alarmit, Niveli 3, u shpall për herë të fundit në vitin 2003.