Armëmbajtja pa leje e “padënueshme”, pezullohen gjyqet

Gjykatat kanë pezulluar shumicën e proceseve që kanë të pandehur për armëmbajtjen pa leje në mjedise publike, sipas dispozitës që prej katër muajsh është shfuqizuar nga Gjykata Kushtetuese.

Të njëjtin vendim ka marre edhe Gjykata e Lartë pak ditë më parë duke ndërprerë gjykimin për një dosje që ka të akuzuar një shtetas për paragrafin 5 të nenit 278 të Kodit Penal.

Burimet i thanë Top Channel se çështja i është dërguar Gjykatës Kushtetuese për interpretim, pasi shfuqizimi i tre dispozitave të armëmbajtjes pa leje ka shkaktuar paqartësi mes gjyqtarëve.

Gjatë gjykimeve të ndeshura që prej 20 shkurtit, një pjesë e gjyqtarëve mendojnë se pas shfuqizimit nuk ekziston më dispozita që duhet të aplikohet për të dhënë dënim mbi armëmbajtjen pa leje në mjedise publike.

I tillë është edhe vendimi që shpalli gjyqtari i Vlorës, Laurent Fucia kur liroi një të arrestuar për të njëjtën vepër. Pjesa e dytë e gjyqtarëve mendojnë se derisa të shprehet sërish Kushtetuesja mund të aplikohet dispozita e vjetër që parashikon një marzh dënimi nga gjobë deri në 7 vjet për armëmbajtjen pa leje në banesë.

Në këtë situatë të paqartë ata që deklarojnë se rrezikohet shkelja e të drejtave të klientëve të tyre janë avokatët. Kreu i Shoqatës së Avokatëve penalistë thotë për Top Channel se gjyqet e klientëve të tij janë pezulluar, por ata nuk mund të qëndrojnë në burg derisa të gjendet një ligj që t’i dënojë.

“E dërgoi dhe kryeprokurori Llalla po kot e dërgoi. Kjo nuk është çështje e Parlamentit, është çështje e Gjykatës Kushtetuese dhe Gjykata Kushtetuese duhet të shprehet sa më shpejt”, tha Visha.

Dispozita e shfuqizuar parashikonte burgimin nga 7 deri në 15 vjet burgim, ndërkohë që nuk jepen të dhëna zyrtare se sa është numri i atyre që janë arrestuar me armë pa leje në mjedis publik. Mes të pandehurve për armëmbajtjen pa leje në mjedis publik është edhe deputeti Armando Prenga, gjyqi i të cilit thotë jo zyrtarisht gjykata nuk është pezulluar pasi ndaj tij rëndojnë edhe akuzat e plagosjes dhe kanosjes.