Arrestohet ish-Drejtori i Përgjithshëm i Burgjeve
Është arrestuar këtë të martë ish-drejtori i përgjithshëm i burgjeve, Artur Zoto.
Zoto akuzohet për korrupsion pasiv, konkretisht për abuzim me tenderët.
Gjykata e Tiranës kishte vendosur masën e sigurisë “arrest me burg” në mungesë për Zoton, i cili sot ka rënë në pranga.
Artur Zoto u emërua drejtor në Drejtorinë e Përgjithshme të Burgjeve më 3 tetor të 2013-s. Ai paraqiti dorëheqjen në korrik të vitit të kaluar tek ministri i atëhershëm i Drejtësisë, Ylli Manjani.
Zoto argumentoi kërkesën për dorëheqje me arsyet personale.
“Duke e konsideruar të pamundur ushtrimin e kësaj detyre në vijim, për shkak të arsyeve personale dhe familjare, ju paraqes dorëheqjen time nga detyra e Drejtorit të Përgjithshëm të Burgjeve”, thotë ai.
Dorëheqja e Zotos u bë pak ditë pas arrestimit për korrupsion të një prej zv.drejtorëve të Burgjeve së bashku me disa administratorë kompanishë private, të akuzuar për korrupsion me tendera.
